سعيد انحراف

سعيد انحراف
خالص الحب و التقدير للشعب الكبير

الثلاثاء، 17 يوليو 2007

العداد




دخلنا يا سيدي استوكهولم
و تذكرة استوكهولم سهلة و الفيزا اسهل
كل الفكرة بتجيب سوجارة طرنادة للرحلات الجوية و دي خليط من مجموعة من الخامات المستصلحة في كولومبيا و سينا مع بعض بخلطة مخصوصة، تلفهم في ورقة شمال افريقيا، و تخش عليهم بولعة من على الزاوية اتلاتين درجة، و تسحب اول نفس قصير، بعديها تتنفس و تشوف اخبارك . جابت معاك الرئة دخان و لا لسه سالكة ، جابت معاك يبقى مبروك حتوصل، تنزل بقى على السجارة و تسحب نفس طويييييل تقعد فيه شوية متزهقش.. بعديها حتكح كحتين و انت مغمض عينك .. طبعا انت حتغمض عينك غصب عنك بسبب التأثير بتاع الصنف، محدش اما يكون مين فيها يعرف يفتح عينه بعد النفس ده .. بس بعد ما تكح افتح عينك تاني تلاقي نفسك في استوكهلم

و انا و الواد حمدي كنسلة بقينا في استوكولهم، و مقولكش بقى ... نضافة ايه و انهار ايه و محلات ايه و مزز ايه
كل حاجة نضيفة، قررنا ناخد تاكسي بقى لحد باب الاوتيل عشان نكمل موضوعنا و احنا بنشرب قهوة في استوكهولم
لقينا التكسي عاملك الواد الالافرنكا و مركبلي عداد .. قلتله يابا الحج عداد ايه انت فاكرنا مساطيل
قاللي : يا بيه استوكهولم كده لازم كل حاجة بالعداد
يا عمي انا سواق تاكسي في مصر و عارف انا بقولك ايه، بلاش تعملهم عليا عداد ايه و بتاع ايه
حنظبك بشلن لحاليح لما توصلنا تعيش بيه
كلمة منه في كلمة مني مسكنا في رقبة بعض فخلعتله العداد من التاكسي

يتبع ..

هناك تعليقان (2):

semsem يقول...

المدونه هايله يا معلم

انا هجى هنا دائما بس حساب التاكسى عليك

سعيد انحراف يقول...

والله الحارة تنور يا سمسم و ملكيش دعوى بموضوع التاكسي ده خالص، اصلا محدش بيركب تاكسيات في الباطنية