البلوجاية الخاصة بالمعلم سعيد انحراف

سر حرب الجواسيس في ثورة 25 يناير

2011-02-05T17:57:00.000-08:00

يا سيدي انا حقولك اللي حصل يوم 25 يناير
اللي حصل ان محصلة الناس اللي راحت تعمل مظاهرات و قلبت معاها لثورة و حرب شوارع كانوا قول مثلا 4 مليون في التحرير و مليونين في إسكندرية و مليونين في السوسي
همه 9 مليون من اللاست
و دول بقى كلهم يا معلم جواسيس بدون اي استثناء ..

و الفيلم العربي دا كله معمول في الموساد اصلا
بس الموساد جاتله مرحلة لقى فيها انه لما بيأجر جواسيس مصريين بيبقى عيبهم 3 حجات
1- انه كسول مبيحبش يشتغل
2- انه بيوصل مواعيده متأخر
3- انه بيحب يفتي

---
المهم يا سيدي ان الموساد قرر يبعت ال 9 مليون جاسوس في يوم 25 يناير و يفهم كل جاسوس منهم انه هوه اصلا الجاسوس الوحيد اللي موجود في الشعب دا كله ..
يعني ال 9 مليون جاسوس اساسا ميعرفوش انهم كلهم جواسيس.. و انهم عمالين يتجسسوا على بعض لحساب نفس الشخص

----
فقالوا خلاص في مظاهرة 25 يناير نقول ان المظاهرة الساعة 2 .. طبعا ال9 مليون جاسوس وصلوا الساعة خمسة مساء

و كان الموساد عامل حسابه طبعا انهم حيوصلوا الساعة 5 .. يعني الموساد كان عايزهم يجوا خمسة فراح قايلهم تعالو الساعة 2

و بكده الموساد حل مشكلة من المشاكل .. طبعا الناس دي مش هبل .. دي ناس شغالة باساليب علمية حديثة و الا حيعرفوا يجندوا ال 9 مليون دول ازاي ؟
دا مش بعيد البلد كلها تكون متجندة لحسابهم يا راجل
مش بعيد انت شخصيا تكون متجند لحسابهم و انت بس مش فاكر لأنهم عملولك لوتفة غسيل مخ على تنويم مغناطيسي بحيث تعيش في مصر على الشخصية اللي انت عايز تبقاها .. و في زمن معين ووقت معين يطلع التنويم المغناطيسي .. تروح منفذ مهمة معينة في ساعة و لا اتنين .. و ترجع عادي جدا تنام و تصحى ناسي كل حاجة .. شغل عالي يابني ..
مش بعيد تكون بالطريقة دي انت شخصيا مثلا اللي فجرت الكنيسة

---------

النقطة التانية الناس دي منهم بس 4 مليون اللي بعتوا معلومات لاسرائيل
و ال 5 مليون التانيين دول اصلا مكتبوش حاجة
دي عالم نامت و شربت و كلت و ادوهم كنتاكي و ماكدونالدز
قالع شارب لابس نايم و يمكن يتجوز و يخلف كمان ببلاش في التحرير
حيكتب ليه..
و الناس دي كانت عايزة تكتب على فكرة، بس الكسل مسكها و معرفوش يكتبوا حاجة .. فقالوا خلاص بكرة.. يجوا بكرة يكسلوا تاني ميكتبوش حاجة .. فيقولوا خلاص بكرة .. يجي بكرة يكسلوا تالت و ميكتبوش حاجة و هكذا لحد النهارده تكتشف انهم لسه مكتبوش اي حاجة

-----

و ال 4 مليون رسالة وصلت اسرائيل .. الموساد
و كان الموساد للسبب دا منزل 9 مليون جاسوس
لأنه بالطريقة دي يقدر يتلافى مشكلة الكسل.. يعني نصهم كسل و مبعتش و كل شوية يسألوه يقول حبعت بكرة
حتقولي و ازاي حتة مكتب موساد في اسرائيل بيعرف يدير 9 مليون جاسوس اقولك يا راجل .. دا اسرائيل كلها موساد .. اسكت اسكت منتش فاهم حاجة

----------

المهم انهم كدا حلوا اول مشكلتين فاضل مشكلة بقى و هيه مشكلة الفتي
طبعا لما تبعت 4 مليون جاسوس يوصفولك نفس الحدث .. و اللي حيفتي فيهم حيفتي .. و اللي مش حيفتي مش حيفتي .. حتقدر بمقارنة ال 4 مليون رسالة توصل لكل التفاصيل اللي انته عايزها و تعرف مين اللي كان بيفتي عليك

اسلوب علمي يابني مش هيصه

و لكن هنا حدثت المفاجأة
ال 4 مليون رسالة اللي وصلت الموساد مكنش فيهم كلمة واحدة زي التانية .. الرسائل ال 4 مليون كلها معلومات مختلفة خالص عن بعض .. و احداث غير بعض و تواريخ غير بعض .. لدرجة ان ناس في اسكندرية كل رسائلها بتوصف الحالة في اسيوط مثلا .. و رسائل من السويس بتوصف الموقف في السودان .. كل الرسائل فتي في فتي في فتي

و مقدروش يصدقوا ان دي جاية من شعب بيفتي في كل حاجة .. و انه اكتر شعب مبدع في الفتي .. فقالوا ازاي كدا؟ مستحيل .. مستحيل ال 4 مليون يكونوا كدا.. علميا مستحيل
فقالوا طب الاحتمال العلمي للي حصل دا ايه؟

ملقوش غير احتمال واحد بس ان مبارك كشف ال 4 مليون جاسوس دول
و جندهم لحسابه
و خلاهم يبعتوا معلومات تمويهية

بكده يبقى مبارك بقى عنده قوة وتطور علمي فوق الوصف .. و همه لسه موصولوش له
فجريوا تاني يوم في الجرايد و المجلات العالمية مرعوبين
و قالوا خلوا مبارك .. سيبوا مبارك في حاله .. سامحنا يا كبير

و دا السبب ان اسرائيل دلوقتي مرعوبة
و كل سنة و انتوا طايبين

الفصل الثاني - حكايات سعيد انحراف- يا مطرة رصي رصي

2008-07-15T07:13:00.000-07:00

بلغني أيها المواطن السعيد بالبلد الرشيد، أن واحدا من سكان الدرب الكحلي، يدعى بسعيد انحراف الجدلي، كانت له بعض العادات الشعبية، التي تختلف في أنها ليست بسطحية، بل هي نتاج فكره الخاص، مم اصبح لاحقا ثقافة أي خباص،
فسعيد انحراف - بالنسبة للصيع - هو النبراس، مع انه ضحية المجتمع و الناس.

الكاميرا تختفي رويدا من عند منطقة قرنيار، إلى غرفة سعيد انحراف، و يبدأ هو شخصيا الكلام

إزيك يا مصر، طبعا في ايام البرورة القارسة اللي احنا عايشين فيها، لازم نلاقي حل! بردان! آه انا مش عايش في روسيا في حتة جوه ادغال النرويج، ولا عايش في القطب الشمالي مع التماسيح السنغالية، ولا في الدنمارك مع الكنغرات ( جمع كنغراية جمع مؤنث غير سالم )و الكناغير ( جمع كنغر جمع مذكر غير سالم ) اللاتينية،
بس برضو بردان، والبرد قاتل.. و عشان دي بالذات انا ليا طقوس خاصة في البرد.

في يوم و المطرا نازلة على اخر اخرها في البلد، قررت انا و حمدي كنسلة اننا ننزل نتمشى في الشوارع، آه انا كده، احب اواجه المشكلة بنفسي. حمدي كنسلة لفلنا سوجارتين من اختراعه، سوجارة اينشتين و دي عشان نعرف نخترع و نلاقي حل، و تركيبها بتتكون من شعرات من دماغ اينشتاين اصلية، و نقطتين مسحوق كلومبي، على 3 معالق نباتات سينا، و بتدوبهم في بارود مخلي بيغلي جوا زيت خروع،
بيطلعلك سوجارة تنسيك الدنيا باللي فيها، السوجارة دي بالذات متتولعش باي طريقة، لازم ب 3 امشاط كبريت مع بعض تولعهم، و تخش بايدك من فوق لتحت مع اتجاه نزول المطر، عشان السوجارة دي زي الكمبيورر كده ، بتدخلها بيانات.. فلما تمشي مع اتجاه المطر و انت بتولعها، كأنك بتقولها مشكلتنا مع الحجات اللي نازلة من فوق

ولعنا السوجارة يا معلم انا و كنسلة و احنا واقفين قدام باب زويلة، و الدنيا ضلمت كحل، وراحت نورت تاني، بس نور بس مفيش اي حاجة تشوفها لا مباني و لا ناس، بعديها راحت ولعت نار، و ضلمت علينا، و في الاخر فتحت تاني .. لقينا نفسنا احنا الاتنين واقفين جوه النيل.. تحت الكوبري على طول.. ازاي معرفش.

اه احنا عايزين نواجه المشكلة بس مش للدرجة دي، طلعنا يا باشا ووقفنا على ناصية الكوبري، و قعدنا ندرس المشكلة، و نطلع و نكتب مقاسات السحاب و طول نقطة المطرة و هيه بتنزل، و بعد ما تنزل، و بعد ما بتخش على النيل و تتفرم جوه، و قطر القبة السماوية، و دي كانت اسهل حاجة نقيسها عشان احنا كنا معليين السوجارة قوي يا معلم

وفضلت تمطر، و النيل يتملي.. و المية تطلع فوق .. فوق فوق، و احنا بنقيس.. و حاطين مكتب.. و كمبيوتر، و مسطرة حرف تي، و برجل، و منقلة، و مغرفة، و دست، و طباشير، و و كتب و مراجع رق المراجعة النهائية كمان قبل الامتحان..

كل ده و المكتب فوق الكوبري، على الناصية، و احنا بنشتغل، لحد ما الشاويش ما ناجي شرايط على حظنا النحس كان بيتمشى في المنطقة ..

لما قرب ناجي شرايط سمع حوار عجيب، انا شخصيا مش عارف قلناه ازاي ساعتها، بس هيه سوجارة اينشتاين كده، حنعملها ايه يعني، مثلا هوه سمع: " الا قولي يا بروفيسور هايدنبرج، احنا لو عملنا غطا حلة كبير يغطي مصر و يبقى جواه 3 4 حتت فحم كبار يدفوا البلد شوية، تفتكر زاوية انحراف الايد بتاعة الغطا تبقى كام عشان تتوازى مع كوكب عطار" ، " و الله يا فروفيسور اينشنهاوين انا شايف ان احسن حاجة اننا نحط مسخنات متعلقة في الجو تقوم بتحويل ماء المطر اللي نازل لبخار ماء، يسافر فوق البلد اهو منه من ناحية يدفي بدال ما يبرد،
ومن ناحية تانية، يحول مصر لعاصمة الضباب رقم واحد نبقى كده ضربنا انجلترا في مقتل." ، " معقول يا فروفيسور هاينزنبرج حنسيب كل اللي عملته انجلترا و نروح ندور على الضباب، انا رأيي اننا نحط في الارض ثقوب حساسة تمتص ماء المطر عن طريق حساسيات.."

و فجأة قطع الكلام صوت اجش عالي قاتل مازع : "انت يا كلب منك له بتعملوا ايه هناااااا " و اذا به صوت الشوايش ناجي شرايط

" يا بيه احنا علماء بنحل مشكلة البلد "

و ناجي شرايط مسك فينا، يا عمي هدي نفسك، مفيش، يا حبيبي معلش، متلاقيش .. و بالعافية اقنعناه يقعد يبص على الورق، الراجل قالك قشطة و قعد ياخد فكرة.. اول ما قعد من هنا قمنا احنا الاتنين و جرينا و احنا بنصرخ يا بوليس يا بوليس، خيانة عظمى، ظابط قاعد بيخطط على الكوبري لاختطاف بنت المسؤول الكبير.. و الكوبري وقف، و الناس نزلت،
و العربيات فضيت، و اللي جي يضرب، و اللي رايح يضرب، و الستات تقول الله اكبر مع الاعتذار لبصران حب السريح

وهنا اذيع برنامج صباح الخير يا مصر، فتوقفت قرنيزاد و تحقق لها النصر

الفصل الأول - قرنيار

2008-04-26T14:26:00.000-07:00

ة

حلقة يوم 20 يناير 2008

كان يا ماكان، في سالف العصر و الألوان، بعد أن انتهت حواديت ألف ليلة و ليلة، و تزوج الملك شهريار من الملكة شهرزاد، و انجبوا ثلاث من البنين، استمر زواجهما بعدها سنين بعد سنين ثم أن شهريار مات، و ابنه حكم البلاد، و استمر على عهد أبيه يحكمها بالعدل و الفساد، ثم جاء ابن ابن/ فابن ابن ابنه، و توالت السنين و الدهور، على عائلة الشهريار المعروف، حتى ظهر زماننا المطيور، و عم الفقر و الجهل و التخلف و الحروب، فهاجرالحفيد العشرون للملك شهريار من آسيا، إلى بلاد مصر، و كان له فيها كشك .. في إحدى حارات الباطنية، في شارع يدعى بالنملة الذهبية، و اسماه بعضهم أيضا بالنملة العملاقة.

و كان للاسم سبب، لما قص من أساطير أنه على نحو عام 1950 أن الدكتور مصالح كبير علماء الباطنية، قام بزرع صفات وراثية لبعض النمل لكي يكونوا أضخم من حجم القرد و يعملوا في حراسة الحارة، من رجال الشرطة الجبارة، ثم أن هذا النمل كان قد تضخم فعلا، و تعلم على يد معلمين الحارة أساليب الهجوم و فنون الحراسة، بحمل السلاح و السنج و المطاوي، و يجيد الاتفاق على جميع الأصناف، و لما نجحت التجربة، دفع معلمين الصنف لكبار العلماء بروسيا و المانيا و غيرها لكي يأتوا إلى الدرب الكحلي و يركبوا شريحة في رأس كل نملة، من الذكاء الاصطناعي، فتكون النملة بجوار مخها لها ذكاء، و بذلك يقوم النمل الصناعي بالاتفاق في الصفقات، و تبادل البضائع، بينما يجلس معلمين المنطقة في الكباريهات، و يقبضوا المعلوم أول كل شهر من النمل،
و كما حدث في فيلم تريمنيتور، جاء يوم صرخ النمل فيه و هاج و ماج، و خرج يضرب في المعلمين، و جعلهم عبيدا منصاعين، حتى أنه بعدها بسنين، كنت تدخل شارع المتبطلجين، تجد عبيدا من البشر ممن كانوا قديما معلمين، يقومون بحمل الحجارة و الأسمنت، بينما النمل يقوم بلسعهم بالكرابيج.

و مرت بعدها سنين طوال، حتى جاء يوم من الأيام، عفريت ضخم، دخل على كل هذا النمل فأهلكه إهلاكا، و طاح فيهم ضربا و سبا و سفالة، حتى قتلهم بالضرب أو موتا بالغم و تأثرا بالسفاهة، و بعد هذا رش أحدهم مربة فول بالملح المخصوص، فوق العفريت المطيور، فتحول إلى ماء، سقط كله في برميل كبير، كل هذا حدث و الناس يتفرجون مشدوهين.
و لما نظروا لمن قام بهذا الفعل الكبير، و العمل الجليل، وجدوا جزمجيا من بلاد السند يدعى بقرنيار، و هو الحفيد الذي نتكلم عنه، و الوحيد الذي عاش من نسل شهريار، فقاموا باستقباله بالاحضان، و القبلات، و سموا شارع المتبطلجين باسم شارع النملة العملاقة تيمنا بهذه الذكرى.
و اما اسم النملة الذهبية، فذاك له أثر آخر، فقد قيل أن العفريت لما قتل النمل، ظلت نملة منهن الملقبة ببنت الملكة، و هذه عند النمل تعادل بنت السلطان في حكايات البشر الشعبية، و هي أرقاهن جمالا و دلالا، و أكثرهن نمولة و نظاما، فترجته ألا يقتلها لأنها ستكون قبيحة إذا ماتت و أكلها دود الأرض،و جثت على ركبتيها تسترحم قلب العفريت
فبكى العفريت و رق قلبه، و تعالى صوته و صياحه حزنا و تأثرا لقلب الأميرة المسكينة، و لأنه طيب القلب رحب الصدر، فقد غير قرار قتلها بالطرق العادية، إلى قتلها بتحويلها إلى تمثال من الذهب الخالص، و بذلك لما تموت تظل جميلة بعد موتها، و هذا إنما أتى من حصافة العفريت، و ذكاءه المتقد كالقنديل.
و يقال أن قرنيار هو من أخفى ذلك التمثال، و حفر له حفرة في مقابر الأسرة، و أنه مع مرور الزمن فقد باعه لعدة أثرياء من أوروبا، و بنى لنفسه أرضا تحت المقابر، فيها أنواع الملاذ و المقامر، لا يدخلها غيره، و بدأ كل يوم يخطف له فتاة أجنبية، من سواح الباطنية، اللائي اتين لشراء الصنف، و الاتجار به في بلادهن و بلاد ما وراء السد، على نحو ما تفعل الباطنية مع شوارعها الضنك.
و كان يستمتع بالفتاة الأجنبية كل يوم، حتى يأت الصباح، فيقوم بأمر حارسه الخاص بقتل الفتاة رميا بالرصاص، و ظل على هذا لمدة سنين و سنين، حتى عرف في أمريكيا اللاتينية و شرق آسيا و غيرها، أن دخول النساء في الباطنية خطر و قلق، فشحت نساء الغرب في أرض الدرب، و لم يكن لقرنيار حاجة في بنات الدرب، لأنه كان يعلم أنه إذا قتل منهن واحدة، فإن أهلها سيسلخوه قطعة واحدة.
و ظل وحيدا شريدا، إلى أن سمعت به امرأة تدعى قرنزاد، من بلاد اليابان، فقررت الذهاب إليه، و المثول بين يديه، و لما تزوجها قرنيار، جلست معه و عرفته أنها عندها اختراع ياباني، يقوم بتسجيل كل ما يحدث في الباطنية، بطريقة سرية، و تشمل هذه الطريقة، ما يقوله الناس و ما يسمعونه، فإذا عاهدها قرنيار على أن يكتم الحديث، و لا يفشي الأخبار، تحكي له حكاية مما لا يعرفه أهل الرواية
فتعجب التاجر الكبير، و أمرها بمواصلة الحديث، فجلست تحكي و تحكي، حتى تدرك برنامج صباح الخير يا مصر، فيتحقق لها النصر، بأن تحيا يوما جديد، دون خوف من مزاج قرنيار العجيب
و كانت تستهل حكايتها بقولها " بلغني أيها المواطن السعيد، بالبلد الرشيد .. " و تختم بقولنا " حتى أدركت قرنيار برنامج صباح الخير يا مصر، فعاشت يوما جديدا و بذلك تحقق لها النصر" و لما جاء الحداثة، و ظهر جيل جديد من الشباب المرتاحة،و تم تنضيف الباطنية من التجار القدامى، و ظهرت مكيفات لا تهلك الجسد و لاحاجة، استخدم أصحاب انحراف ماء العفريت الذي عند قرنيار، لعمل المزيد من السوجاير التي لها أثر السحر على البهايم. و هذه هي فكرة كتابنا الشهير، و نتابع الأسبوع القادم المزيد و المزي

مدخل

2008-03-09T14:33:00.001-07:00

مدخل

سعيد انحراف و شوقش هما شخص واحد، و لكن لضرورة احياء القصيدة من مطالعها العجيبة، قررت عمل فكرة تقمس الشخصية في ثيابها الاليكترونية
فمنها ان الشخصية تكون حية ترزق، في الاذهان اعني يا ذائق المعاني
و منها انها تكون مكانا لتنظيم الردود، فلا جدال ان النظام سر الوجود
فيا ايها القاريء في بلد المقاريء.. لا تنس ان هذه القصص و الاراجيز هي صفوة ما عندنا من التهييس، فلا تخلط بين الكاتب و الاتوبيس فهذا يكتب ليمتع بالقلم و المداس، و ذاك يمشي ليوصل الناس ، و كل طريق مزدحم فهذا زحامه الفكر، و ذاك زحامه البازلاء

كتاب الوش و المعروف باسم الفيس بوك

2008-01-14T11:40:00.000-08:00

يا مصر انا عملت اكونت على الفيوس بوك و ليا هناك جروب
يا ريت تبقوا تشرفونا بالزيارة

http://www.facebook.com/group.php?gid=11713656619

عارف بسلة

2008-01-12T12:08:00.001-08:00

كل ما اجي اشتري حاجة من سوبر ماركت الاقزام التمانية اللي في حارتنا المبجلة، افاجأ بإن صاحب السوبر ماركت ألا وهو عارف بسلة، يبدأ معايا حوار ملوش تلاتين عازة، اللي هوه منه ازيك يا بيه، انت لقيت وظيفة ولا لسه. طب انت بتكسب كام من التاكسي، طب انت بتاكل ايه بعد الضهر، بتعمل ايه لما تبقى لوحدك، بتفتح الشباك، بتكلم حد في التليفون كل يوم، و لو كلمت حد بتقوله ايه و بيقولك ايه.

و هات يا أسئلة لحد ما وداني ما ورمت، وانا من سذاجتي بضطر ارد و انا عاصر فوق نفوخي العشرين لمونة اللي انا اصلا نازل اشتريهم منه، و بعد كده بروح اشرب 25 حاجة ساقعة من بتاع الخضار لحد ما ابتدي احس بحرارة الغضب بتنزل.

وفضلت الايام تروح و تمطوح فيا .. كل ما اروح اشتري حاجة و لا حد يطلبني على تليفون سوبر ماركت الاقزام التمانية، أوفاجأ بأمطار من الأسئلة ملهاش اول من اخر، لحد ما في يوم من الايام و سالف العصر و الالوان ما كان نازل معايا حمدي كنسلة يشتري اسبرنتين من السوبر ماركت، قبل ما يعدي على الصيدلي يجيب من عنده علبتين سلامون و ربع كيلو جبنة .. و شاف بنفسه الحالة المستعصية اللي وصل ليها عارف بسلة.

و عنها و حط ايده في جيبه و طلعت سوجارة القلق، و دي سوجارة مكونة من 3 حجات: العنصر العاشر و دا اللي محدش في العالم يعرف حمدي كنسلة استخرجه ازاي مبدئيا، و مية العفاريت، و دي مية بتشتريها من 3 شارع النملة العملاقة و اللي اكتشفها قرنيار و ده يبقى الحفيد الخمسة و عشرين للملك شهريار الحقيقي. و اخيرا معلقتين سكر.. و بتلفهم في ورقة البفرة الشهيرة ، و بتخش بالنار بزاوية 30 بوينت 4 اللي بتفتح على الطريق الصحراوي. و عنها و الاسئلة اللي عمالة تنزل زي المطر بقيت بتتقهقر امام الردود المتعرفتة..

بمفعول السوجارة دي شدينا كورسيين و قعدنا قدام عارف بسلة، و ابقاقنا ( جمع بق ) اتفحت عن ابتسامة تدل على وسامة و بلاهة في نفس الوقت .. و عارف بسلة نازل باسئلته يمين و شمال و فين يوجعك.. و بعد حوالي 9512 سؤال من عارف بسلة و دول طبعا كانوا اللي هوه صباح الخير بتاعته، بدأت ايجابتنا ترف عليه زي البحر.. انا شايف واحد من الجمهور بيسأل و يا ترى ايه ايجابتكوا؟

ببساطة شديدة كل ما كان يسأل سؤال، احنا نقوله و تفتكر ايه الاجابة، فيضطر يقول معرفش، فنقوله اذا كان عارف بسلة نفسه ميعرفش، حنعرف احنا .. و عنها و عارف بسلة جاتله حالة ملل و بدأ يقول انا بسألك انت عملت ايه النهارده، تفتكر عملت ايه، يقولي معرفش مانا بسألك، اقوله يعني معندكش فكرة انا اصلا بقضي يومي ازاي.. ازاي بتسأل عن النهارده و انت مش عارف انبارح حصل فيه ايه. يقولي يا عم حقك عليا بس قولي كلمت مين النهارده يخش عليه كنسلة و يقوله، تفتكر حيكلم مين يعني، يقوله معرفش يمكن كلم حد من الجيران، يقوله زي مين يعني، يقوله زي جارته شوقية المدارية، يقوله و انت سألتها كلمت مين النهارده لما جت تشتري محلول معالجة السراب؟ قالنا اه .. طب ما هيه لو كانت كلمته ما كانت حتقولك، يا عمي انا بقول مثلا مثلا ..لا حدد لو سمحت.

و ما كان مننا بعد الحرب الشعواء اللي قامت، الا انه في الاخر زهق و احنا زهقنا، فمضينا مع بعض معاهدة السلام بين السوبر ماركت و بينا، بانه بعد كده يساله سؤالين بس في اليوم، و احنا نرد عليه بسؤالين، و يبقى يا دار ما دخلك شار.

السينما الموبايلية 2

2008-01-05T05:06:00.001-08:00

الجزء التاني

لقراءة الجزء الأول اضغط هنا، او اسركول داون

http://en7raf.blogspot.com/2008/01/blog-post.html

قعدت انا و كنسلة بنفكر طول الليل في حياتنا، و مستقلبنا، و أملنا، و أفكارنا.
الراجل اللي جايلنا من الخليك دا راجل معاه فلوس، فلوس كتير قوي .. و عايز حجات تدلع الناس و تضحكهم، بس مش عايز قصص.. ضحك عشان الضحك بس و يا سلام ولازم يكون هايف. تخيل اما واحد يقولك خليك هايف تكسب فلوس. نعمل دا و نكسب فلوس، و بعدين نسيبه، ولا منعملوش و يا دار ما دخلك فار؟
قررنا نعمله، نكتب سيناريوهات تعبانة و نمثل فيها، و بكده حيكون فيه في يوم من الأيام مودام سعيد انحراف، حتجوز سيمون أضاليا يا جدعان.. لمينا الحارة و عملنا لوكيشن.. سبوتات الضوء اخترعهلنا مخترع الحارة و ساحر الصحراء باولو مصالح.. و طبعا انفجرت في وشنا لما بدأنا تصوير، الكاميرا جابهلنا الميكانيكي الكبير و معلمي في فن الصنعة : موبين مهاميها. و طبعا كانت كاميرا بتكنولجيا ما بعد الديجيتال، ودا نظام كمبيوتري جديد بيعتمد على وحدة المايكرو بيكسل و هيه واحد على مية من البكسلاية. و دي بسببها كنا بايينين زي النمل.. اما المخرج فكان لازم نلاقي مخرج
مدير التصوير كان كنسلة، المخرج كان أنا، الازياء كان كنسلة، لكن مساعد المخرج كان برضو انا، المؤثرات الصوتية كانت فرقة حسب الله الثاني و العشرين من حارتنا، الفرقة الاستعراضية كانت فرقة تحية سبارس، و انا كنت الملحن، فنون المط كان باولو مصالح، و انا كنت الاكسسورات. يعني من الاخر اتصرفنا و عملنا 5 افلام لسينما الموبايل.
و بعتنا الافلام حسب الميعاد للراجل، و كانت الافلام عبارة عن نكت بايخة لميناها من القهوة، و قعدنا نفلتر فيها و كان اول فيلم اسمه و قصته في نفس الوقت واحد طلع على المعاش و معرفش ينزل، لأن النكتة دي بتمثل حجر الاساس لكل حاجة بتضحك في ثقافة الانسانية، و حكينا فيه معاناة الانسان و هوه بيطلع على المعاش و مدى اليأس اللي بيحصله لما مبيعرفش ينزل، و الفيلم التاني بيتكلم عن كمسري الاتوبيس اللي كان ماشي في جنازة فقالهم يا جماعة وسعوا شوية الجنازة فاضية قدام، و الفيلم ده اسمه كمسري الجنازات المتألط، و 3 افلام تانيين كانوا مش حينفع نحكيهم هنا عشان عيب قوي ننزل بمستوى البلوجاية لما تحت الصفر
الراجل وصلته الحاجة، و اتصل بيا انا شخصيا في التليفون، قالي هايل، ممتازـ رهيب، قنبلة، كارثة، دمار، خراب، معضلة يا ابني انت معضلة، فلوسك حتوصل بكره.
و احتفلت الحارة باليوم التاريخي ده، و هوه يوم دخول الفلوس جوه الحارة، و التجهيز لان حياتنا كاتنين شباب صيع ضيع ( بتشديد الياءات ) النهارده اثبتوا لمصر كلها انهم قادرين على ان يكون في حياتهم مودام، انهم يعيشوا مصر منغير ما يهاجروا ترينداد و توباجو يعملولهم قرشين و يرجعوا، انه حيبقى فيه موبايلات في ايدينا و لاب توبات، و حنروح الكافيه مع بضينا.. يا جماعة حنروح الكافيه و حنسيب قهوة كريستوفر بونابارت زينا زي اي اتنين عاديين من شباب هاليوبليس و نادي الشمز.

فات يوم، و فات اتنين، فات شهر و فات تلاتة، و كل يوم اتصل بالراجل من الساعة 8 الصبح لحد 8 بليل و مفيش رد.
في ليلة من ليالي الشتاء القارسة البرورة، واحنا قاعدين في كباريه الزنبقة الخضراء، رن التليفون في تمام الساعة الواحدة بعد منتصف الليل، و فوجئت بالراجل بيتكلم، و زي ما بيقول رجل المهابيل ادهم جروبي: فتهللت اساريري .. كل اسريرة اتهللت لوحدها شوية..

- الراجل: يا جماعة .. احنا: الفلوووووس .. الراجل: يا اخوانا.. احنا: الفلوووس ..
قعد يقولنا يا جماعة اسمعوني يا جماعة افهموني و احنا النني بتاع عنينا قلب لعلامة الدولار و الريالة واقعة و بنقول الفلوس الفلوس
قالنا يا اخوانا انا حكلمكم بصراحة، اصل هفتورة ابو موس جابلي واحد.
قلتله: واحد؟ واحد ايه ولا مؤاخذة؟
قالنا: واحد بيعمله تلاتين فيلم في الشهر و بياخدله 3 الاف جنيه .. و انا معايا الشغل و معايا ال..

فقفلنا في وشه السكة.. و احب اقول هنا ان خلاصة الاعراب ان الراجل هوه الراجل، بس لازم واحد يجي من شعبك ياسفنلك رزقك و يقولك اصلي بعمل لمصلحة الراجل.

و هوه الراجل لو كان محترم كان حيروح لحد تاني منغير ما يقولنا بعد ما جلنا لحد عندنا و عرض علينا؟

و الراجل بيقول ان الصوت اللي سمعه هوه هوه الصوت، و التسجيل تعبان، و الجودة بتاعة الفيلم واقعة. جودة ايه يا جدعان هيه الهيافة في زمنا بقى ليها جودة؟
بيقولك اه ما اصل الحاجة مبتضحكش، و الناس اللي كانوا بيوزعوله افلامه بطلوا يكلموه و ان احنا اللي بوظناله علاقته.
اه يا زمن، مين كان يصدق ان هفتورة ابو موس يطلع منه ده كله، و مين كان يصدق ان في بلدك الحاجة ام جنيه فيه مليون واحد حيعملها بقرشين.. و مين كان يصدق ان الهيافة يبقى ليها سوق في بلاد العرب، اللي كانت في يوم من الايام جزيرة الحضارة و التقدم

السينما الموبايلية

2008-01-01T05:32:00.001-08:00

أنا كنت فين

ناس كتير قوي بتسأل انا رحت فين؟ و عشان كده قررت، انه بإذنك يا رب .. اقول في البوست دا انا كنت فين طول المقاس الوقتي اللي فات

كنت قاعد يا عمي لا بيا ولا عليا في حارة الدرب الكوحلي، بغني لسوجارة المكتب رقم 18 اغنية ان ماكنتش انت تدلعني مين حيشخلعني، كنت قاعد كده لا بيا ولا عليا على
الرصيف و جنبي حمدي كنسلة و معاكي يا سجاير و معاك يا ملل.. شابين مصريين عادي جدا مفيش اي حاجة

فجأة جت قدامنا عربية 50 دراع، قعدت تسف الاسفلت و المية على دماغنا لمدة نص ساعة لحد ما وقفت و شفنالها باب .. و اتفتح القزاز المتفيم و طلعت ايد كم ابيض، و سيجار
لونه بني غامق ، و مترصع بالالماس، و راح منادي علينا : انت يا كلب انت و هوه، انا عايزكم في شغل

طبعا انا و كنسلة جرينا عليه بنهاوهو.. و كنسلة قعد يهز ديله.. شغل يعني فلوس، فلوس يعني فيه امل، و امل يعني حنعيش، و نعيش يعني حنكمل

خلاصة الاعراب خدنا الراجل على قهوة كريستوفر بونابرت، و طلع واحد من المصريين اللي سافر بلاد الخليج العربي و عمله قرشين، و قرر انه هوه ييجي ينتج مسلسلات موبايلية
يعني ايه مسلسلات موبايلية؟ يعني عدم الامؤاخذة بدل ما ينزل المسلسل من دول في التزبليون، حينزله في الموبايل. و الناس تعمله تحميل .. و عايز يعمل اعلانات في الجرايد و المجلات
و يقول خشوا على خدمة كذا، و اطلبوا رقم كذا، و نزلوا مسلسلات انحراف

" انا شفت البلوج بتاعك، انت كارثة، انت قنبلة موقوتة، انت مستحيل انت مش ممكن .. انا عايزك تعملي شو .. شو جامد جدا يخلي الناس تنهبل من الضحك "

قلتله يا بيه عدم اللامؤاخذة احنا نظامنا ايه .. حنشتغل لوجه الله و الوطن ، و لافيه لامؤاخذة كده، معلش منغير احراج .. شوية لحاليح؟

قالنا: لا طبعا، دا الدوان لوود يا جماعة بيدفع فيه كتير قوي، و انا حخليكم شركا معايا بالنص.. و ..

طبعا اول ما سمعنا كلمة شركا دي، كنا مشينا اصلا.. و هيه دي مصر النهارده، الناس تجيلك تقولك اعملنا شغل ببلاش و خليك شريك معانا

الراجل اتخض، جري ورانا .. والله ما اقصد والله ما .. قلتله: خلاصة الاتفاق احنا ناخدلنا فلوس في اول 10 حلقات.. كسبت يابا منهم حاجة حنتأبج مكسبتش اتكل على الله

سعيد انحراف: على فكرة الراجل ده انا افتكرته، مش دا اللي كلمنا من سنة و قالنا نفس الفيلم الهندي ده .. و خلانا نكلم ناس بتوع صوت، و ناس بتاعة تحريك، و ناس بتاعة
سيناريوهات، و يقولنا شغلوا فريق معاكم .. فعملت انا كل حاجة لوحدي و في الاخر اختفى و قالنا ابويا مات

كنسلة: ايوه هوه .. الراجل ده شغال علينا افلام بقاله سنة بس التذكرة منسية الواحد

و فعلا دا اللي حصل، الراجل قعد يطنط و يشبط في الحبل و ينزل و يروح و يجي ، لحد ما قال خلاص انا حديكم في الحلقة الواحدة بس كده 5 الاف جند

و بعدها غرق على طول في الريالة بتاعتنا

بلعت ريقي بالعافية و قلتله 5 الاف جند ، يعني العشرة ب خمسين الف جند، يعني حتجوز و حعيش و حعدي و حبطل السوجارة
يعني مش عايز اهاجر ترينداد و توباجو
موافق
بس ادفع خمسين في المية الاول
قالنا ماشي .. قلنا بركة

و عدا يوم
و عدا يومين
و عدا 3 ايام
و عدا 4 ايام
و احنا قاعدين كده على الرصيف لا بينا و لا علينا .. جت العربية تاني، و قعدت تمشي تمشي لحد ما وقف الباب و اتفتح
و نزل منه الراجل هوه هوه، وماسك حبل في ايده، في اخره طوق، معلق فيه واحد قصير قوي ماشي على 4.. قلناله مين دا.. قالنا دا الصبي بتاعي الجديد، هفتورة ابو موس

كنسلة: و مين هفتورة ابو موس؟
قالنا: لا دا معايا

احنا اتكسفنا نسأل ايه دا معايا دي، فرحنا من الاخر مورينله افكارنا
هفتورة ابو موس لاقيناه بيقول: يا جماعة مش شايفين ان 5 الاف جند دول كتير حبة
كنسلة قال: ايه يابا مش احنا اتفقنا؟ عجبك على كده عاجبك مش عاجبك الباب يفوقت جمل
قالنا: لا خلاص

و عنها يا معلم و نزلنا افكارنا للحلقات، و السيناريوهات بتاعتنا على الترابيزة.. الراجل اداها بصة و شمله شمة و رجع بيقول: ايه يا عم اللي انتو عملينه دا.. ايه المآسي و المذابح و المشاكل اللي انتوا حطينها دي .. انتوا فاكرين نفسكوا بتكتبوا فيلم صلاح الدين
قلتله: يا بيه احنا بنكتب عن الشعب، بنكتب الواقع
الراجل: واقع ايه يا عم، انا عايز ابيع حاجة تضحك الناس. واقع ايه يابو واقع.. احنا عايزين شخلعه
هفتورة/ ويا ريت تلبسوا جلبيات و تتكلموا لغة خليجي عشان حنزل الكلام ده في الخليج
سعيد: يا عمي انا مالي ومال الخليك
الراجل: معلش خليج انت على جنب دلوقتي، الخليك بيفهم اللهجة المصري كده كده/ انا عايزهم زي ما همه

كنسلة دخل بحتة عرضية وقال: يا جماعة احنا مش كنا بنقول الاول ان الحلقات دي حتنزل مصر، ينفع دلوقتي ننزلها الخليج كمان؟
قالك اه ينفع .. قلنا وماله برضو، ما الافلام المصري بتخش الخليج و تبيع شغال

بس تفضل مشكلة،
الراجل مش عايز السيناريوهات دي
الراجل عايز هيافة، حجات تضحك .. حجات تخلي ناس معينة في الخليج تهز كرشها من الضحك منغير ما يبقى ليها اي هدف
ازاي ممكن حد يكون بيشتغل و بيكسب عيش، و بياكل و بيشرب من الهيافة بس؟ بس انا مستغرب ليه، ما هوه ده اللي بيجب فلوس في زمنا
و الشاب مننا حيضطر يطاطي للزمن و ينسى انه كان في يوم من الايام بيقول للعالم كله انا مصري، احنا خلاص بقينا زبالة قوي، مش انا اللي حصلح ده
لو حاولت اصلح حيتهموني اني نصاب، او بقولي كلمتنين، او صدقت اني ممكن اغير حاجة .. في بلدنا انك مجرد تصدق انك ممكن تقدر تصلح حاجة فيها ده في حد ذاته سبب ان الناس تضحك عليك
و يفتكروك عبيط .. او ضارب حاجة ..
و حنعمل ايه عشان نخلي السيناريوهات دي تتباع فعلا للراجل ده، نغير شخصيتنا ؟
نغير اسلوب سعيد انحراف و حمدي كنسلة، و نخلي الدنيا هايفة شوية
يمكن هوه دا الصح، اننا نهدي شوية عشان الفلوس حتخلينا نخرج من الوساخة اللي احنا فيها، سجاير مضروبة و اسطوانات سيكو سيكو.. يمكن لو عملنا كده عشان كل واحد فينا يبقى عنده
عربية و مدام و بيت يمكن الغاية تبرر الوسيلة، لازم نبيع الهيافة في سوق الخليج
و يمكن ده غلط .. يمكن الصح اننا نفضل نضرب في سوجارة ورا سوجارة ، و استوانة ورا استوانة، و صحة ورا صحة، اهو نموت قبل ما نبوظ الدنيا اكتر ما هيه بايظة

نعمل ايه؟

( يتبع )

الفاضي يعمل مسحراتي

2007-09-26T15:45:00.000-07:00

و قررنا نصوم رمضان

قررت أنا المدعو سعيد انحراف، و أنا بكامل قوتي الانحرافية صيام شهر رمضان السنة دي، من أول يوم لحد آخر يوم، و ده معناه طبعا إنه مفيش أي صنف من أصناف السجاير يمكن استخدامه قبل ما المدفع ما يضرب.

و نزلت فورت البنزين في التاكسي بتاعي و قلت الرزق عليك يا رب، و انا كتاجسجي عنتيل، لقيت الدنيا كلها في رمضان على الصبح داخلة في بعضها مكعبات، ولا لو حد يفتكر لعبة الميكانو، كل عربيات مصر معشقة في بعضها زي الميكانو و عاملة جبال جبال جبال، مفيش مباني مفيش شوارع مفيش ناس.. الناس مش لاقية مكان تحط رجلها على الرصيف فبتمشي فوق العربيات .. الواد حمدي كنسلة عندك مثلا، جايب لنفسه أدوات تسلق الجبال و عمال يتسلق في جبال العربيات.

و أديني قاعد في التاكسي بتاعي واقف في طابور عربيات لا هو مكعبات ولا ميكانو، لأ بازيل، و الناس قفلت الموتور و نامية قدام الدريكسيون لحد ما ربنا يفرجها و العربيات تمشي، و الزبون اللي ورايا في الكنفة جايب جرايد الدنيا و الاخرة و عمال يقرا في الكاريكاتير و يضحك زي العجة اللي كان بيضحك في "مالهادي تتحدى الملل" و هوه اصلا شبه السوبر استيك اللي بيلبس نضارة الغطس على نضارة الحمام و ينط في الهوى و يخبط الناس الظريفة و الحوار ده، و عمال يأزأز لب يرمي اللي جوا و يبلغ القشر و يقولك اهو انا كده مفطرطش، معذور ما هو الواحد لازم يسلي صيامه برضو، و أنا من ناحيتي عمال اقول فينك يا سوجارة " عاصفة الصحراء " دلوقتي، و السوجارة دي بقى يا معلم بارود مخلي، تخش في المخ تقلب كل الهلمه اللي قدامك في الشارع دي لصحراء جرداء فاضية، الواد كنسلة اداني نفس منها في يوم العيد السنة اللي فاتت فتحت قدامي الطريق إلى بغداد وش، و في وسط الصحراء كان فيه شواطيء جيزرة الباو باو، تقعد على المرجيحة و الحريم بيشخللو كده .. يا لهوي امتى يا رب بس افطر، و اخش بعديها على التحف النادرة اللي عندي في علبة السجاير.

و الفاضي يعمل مسحراتي زي ما بيقولوا اليومين دول، اتصل بحمدي كنسلة و قلتله انجدني، واحد يقولي ينجدك ايه يابني مش انته صايم، و مفيش صنف قبل الفطار؟ اصبر عليا بس، كنسلة ده مش تاجر ولا صاحب هواية، دا براند نيم ياجدعان

اتضح ان حمدي عشان يمشي حاله في ايامنا المباركة دي، و زي ما انتو شايفين انا بكلمكم من جوا جبل المكعبات بتاع العربيات، لقيته بيبعت ناس بطيارات هليكوتبر توصلك البضاعة كار ديليفري، و نزلك سوجارة الوهم، و دي بقى يا باشا عبارة عن سوجارة مليانة ورق فاضي، مبتولعهاش، بتحطها بس في بقك .. و تقعد تتوهم انك عايش عليها، هوه حل مؤقت بس نعمل ايه، لكن بعد الفطار بتمر على حمدي كنسلة في قهوة كريستوفر، و بيعبهالك بالياميش كله.. الياميش طبعا هنا في الباطنية حاجة تانية، معجون مخصوص من كولومبيا على شوية مساحيق من الصين و السنغال، مضروبة في بعض بتخش عليها بزاوية غير مباشرة، لو دخلت من الوش تتبهدل .. تبرم معاك في الطلعة الاولانية بس، اول ما تولعها .. تخش تجيبك وش و تعليك طحن، و فجأة تلاقي نفسك في فوازير رمضان اللي عمرك ما شفتها يا معلم، قاعد عايش حياتك حاطط ايدك على خروفين مدبوحين، و خمسة و عشرين جارية بيرقصوا قدامك في قصرك و السياف على شمالك و شهرزاد على يمينك.. و تقعد كده لحد ما المسحراتي ما يأذن .. تقوم تفوق على طول اوتوماتيكي من التأثير بتاع السوجارة، و تستعد ليوم رمضان جديد و كل سنة و انتو طيبين

التكسجية

2007-09-04T03:12:00.000-07:00

الحياة لا بد و أن تبدأ فيها من حيث انشكح الآخرون .. هوه ده المثل اللي افتكرته النهارده و انا بدي احدى اهم دروس الصياعة.

عنها يا بيه و حمدي كنسلة عم الصنف و المزاج زارني زيارة وقت العصاري، و قالي: يا معلم سعيد انا نفسي تعربلي مواضيع التكسجانجية .. بم انك تكسجي عنتيل.

لميت النفس من الشيشة سحب على النخاع الشوكي ثم على المخ و غطست المخ في الدخان .. و رحت مسربه من فتحتي المتخر.. و انا ببلع السؤال، مالها التكسيات

كنسلة – يا بيه من حوالي ست سنين كان التاكسي تلاقيه ابن ناس محترم، و تديله القرشين يبوس ايده وش و ضهر و يسحب عربيته و يتوكل على الله، دلوقتي الشغلانة فيها لسه ناس ولاد ناس، لكن فيها ناس ولاد ستين، الواحد ميعرفش يسلك في مشوار غير و همه عايزين يتربسو منك برزتين، و يقولك البنزين غلي

حضرتنا – قوله البنزين غلي في امريكا يا خالتي، و انتي لسه بتشغلي لمبة جاز

كنسلة – يعني ايه

حضرتنا – يعني اللي يقولك الكلام ده يبقى يا اهبل يا بيستهبل، من 3 سنين العربيات دي كلها اشترت مكنة بتخليك تمول غاز طبيعي، المكنة دي نزلتها 3 شركات في مصر عشان يزبطوا بتوع التكوسة. كل عربية تركب فيها مكنة تدفعلك حوالي 5 الاف جند. شعبك كله نزل الشارع و اشترى تاكسي و فتح بيت. اللي عاملك فيها دكتور و اللي عملك فيها ملوش في الطحينة و لاالطور. و الشركة كانت بتخليهم يدفعوا تمن المكنة على القسط المستريح و لعلمك ناس منهم كتير مدفعتش اقساطها و عملت فيها الواد الناسي

كنسلة – يعني كل دي افلام هندي .. يا بيه الراجل خدني مشوار ربع ساعة و عايز يلهف مني خماشر جند

قلتله بهدوء – بيصيع، لما توقف تاكسي قوله انا رايح الحتة الفلانية و معايا كذا/ يا تقبل يا ترفض. و متخشش في حوارات معاه.

و ان مقبلش غيره حيقبل. التاكسجي المحترم يقول اللي لينا لينا و الرزق على الله

كنسلة – و ان قلتله سبتني على البحر و نزلني الساحل، ما هو لو الواحد بيوقف تاكسي في السريع مش حيلحق يتفق

حضرتنا- ساعتها انزل في شارع عمومي، و اديله حسابه بما يرضي الله. حيبق معاك طبعا، قوله انا معيش غير كده. حيقولك ميجيش حق المشوار يا بيه، قوله ده اللي معايا، لا انا ابن تكسم باشا عشان ابقى وزير، و لا انا الموناليزا عشان استنى عريس. يعني من اللاست انا راجل على قد حالي حسرق عشان اركب تاكسي

حيقولك اما ملكش فيها بتركبها ليه، قوله و يالي ليك فيها مركب واحد ملوش فيها ليه.

كنسلة- و ان وقفلي تاكسي تاني و سأله على الاجرة، ما هي بقيت موضة

حضرتنا- دي موضة فعلا طلعت في اوائل الالفية الجديدة، تبع التطور الحديث .. على حسب مزاجك، قوله ما اسخم من سيدي الا ستي، سبتلي حد من الشارع و اسأله على الاجرة.

الناموس الأفريقي المتوحش

2007-08-08T20:10:00.000-07:00

بإذنك يا رب، بلوجاية المعلم سعيد انحراف رجعت للنور تاني، بعد ما وقفها البلوجر قال ايه اني بعمل سبام. اشحال ان مكنتش من البلوجاية للايمل و من الايميل للبلوجاية محدش يعرفني ولا سمع عني. افصل يا عم .

نرجع لموضوع النموس .. و مصر السنة دي جايلها دفعة من نوعية الناموس وحيد الحقنة، فيه حاجة اسمها الحيوان وحيد القرن، اتضحلي انا بقى ان الناموس اللي في مصر اسمه الناموس وحيد الحقنة.. كل واحد فيهم مركبلي سرنجة في حنكه.

و الناموس السنة دي في الحر ده ناموس متعلم مش هيصه، شكله وافد من بلاد افريقيا، الناموساية يا جدعان مش بتطبش في الدراع ، دي بتمسك الدراع و تشوف العرق فين، و تعد تخبط عليه بجناحها لحد ما يفور، و تقوم ترشق بحنكها في العرق من النص بالظبط .. بت المفعوصة حرنجية نيشان! و عنها و اول ما اشقر على دراعي الاقي بقى الناموس سايب ذكرياته عليه.. عارف انت اما تخش الاتوبيس المكيف تلاقي الشعب الخفيف سايب رسوماته الفرعونية على الكراسي، نجلاء بتحب النجاشي خليعة و الأفلام دي، معلش ما هيه كلها ارزاق، اجدادنا كانوا بيحفروا كتابتهم على الحيطة و احنا بنكتب بالقلم الجاف على كراسي المتروهات و الاتوبيسات.. المهم هوه الناموس المصري ده برضو عنده العدوى السنة دي، و بيكتب على دراعي بالقرص بتاعه.

و الناموس ده بقى لقى لقيه، كيس لحمة مليان دم .. فبيعزموا بعض على حساب اهلي.. و موبايلات لعلمك .. بت يا ناموسة خشي على الكتف و انا حمزمز في الايد .. التانية تبعتلها اس ام اس علم و جاري التنفيز

نزلت و جبت ايزالو.. و فتحت الشباك و نمت.. لقيت مصاصين دماء داخلين .. مش ممكن ده يبقى ناموس دول اكيد مصاصين دماء، دول اصلا بيتنفسوا الهوا بتاع ايزالو .. حتى الناموس في مصر بيدمن و بيدمن ايه؟ ايزالو!

ملقتش قدامي غير حل واحد بس و هو سوجارة الصقيع بتاعة الواد حمدي كنسلة و الحمدلله كان عندي واحدة فاضلة من التركيبة القديمة، فتحت ورقة الانستركشنز بتاعتها و بدأت انفز .. الأول الواحد بيسحبله 3 انفاس و يكح كحة في الاخر و دي غصب عنه طبعا.. بيلاقي الدنيا اصفرت سنة معاه يبقى كده هوه ماشي صح .. و ميقلقش ده بس لون خلفية و حيروح .. بعد كده اديت 6 ورا بعد و رجعت دماغي ورا .. الدنيا احمرت سنة مظبوط .. كده اقدر اخش على النفس الطويل.. دخلت عليه ربع ساعة بسحب و رحت فاتح المحابس .. وداني طلعت دخان، و بوز الجزمة بتاعي وقف .. و ياقة الجاكت و قفت و فجأة ..

صدقت النبوءة

التلج نزل..

و العواصف التلجية اشتغلت .. و لقيت نفسي في اول ناصية يمين و انت داخل القطب الشمالي .. و البطاريق ملت مصر تاني .. و كلاب البحر ..

و الناموس بقى بيرقع بالصوت .. رحت جبت منشار و نشرت حتة من التلج ، انا حربيكم يا كلاب .. المهم لما نشرت حتة التلج المية بانت من تحتيه ، رحت لميت الناموس ده كله و همه بيقولولي ارحمنا يا معلم سعيد .. نبوس ايدك ، و انا ابدا ..

و رحت راميهم كلهم في الميا الساقعة .. الحيوانات الرمم .. ياله يا حثالة الحشرات .. و رحت قافل عيهم الحتة الليك نت نشرتها .. و بصيت من خلال التلج و لقيتهم و همه متجمدين و باصنلي بذعر.. يالله البقاء لله

النت المصرية سريعة طحن و رخيصة كيك

2007-08-02T19:41:00.000-07:00

الدنيا حر و عايزين نلطف، قلت ياله يا انترنت، فتحت الكمبيوتر في السايبر بتاع قهوة كريستوفر بونابرت و نزلت عليك يا ام اس ان
لقيت البت جاكلين الامريكانية قاعدة عالنت و دي اصلا مبتنمش مبتكلش مبترشبش مبتشمش حتى ، قاعدة 48 ساعة في ال 24 ساعة رشقان و معاك يا داون لوود و معاكي يا باندويث
قلتلها سعر النت عندكم كام قالت بناخد يا بيه بتاع تمانية ميجا في الثانية ب 21 دولار
دخلت على صاحبي الالماني قلتله يا با النت عندكم بكام قالي يا باشا النت بحوالي 20 ل 30 يورو سرعة 1 ميجا في الثانية
طب يا عمي ال 20 ل 30 يورو دول معاكم بالمصري يجيبو كام قاللي يا باشا 150 جند مصري
رحت للكندية صاحبتي يا استاذة النت معاكي بكام قالتلي يا باشا انا بالذات بقى حاجة تانية انا غاوية داون لوود افلام ، ايه ده؟ هوه العيال اللي قبلك دول كانوا داونلوود سايتات بس؟ المهم بتاعة الافلام دي حساباتها كام
قالتلي انا بدفع 21 دولار كندي و معايا بيهم بتاع 4 ميجا في الثانية

ميجا ميجا ميجا؟ هيه العالم كلها بقيت بتتكلم بالميجا و احنا عايشين بنطحن في بعض في البلد على 256 كيلو بايت

و فجأة لقيت العالم بيسألني و يا ترى يا مستر انحراف، النت عندكم سرعتها كام و بكام ... الامريكاني يسأل و الانجليزي يسأل و و و و .. كله نازل أسألة مصر، بلد الفراعنة ، شحتسبوت التاسع و رمسيسة العاشرة، الاهرامات و ابو اللوز و طنط ناهد الشريف بلد التقدم و الحضارة و الكلام اللي انته حافظه النت بتاعتها ايه نظامها

اسكت؟ عيب! اسيبهم و امشي؟ ميصحش!
اقولهم ان الدنيا بتردح- لبعض هنا على 256 كيلو بايت و ان الواد تلي سب الليل اعتبرناه في المونطقة من علماء الذرة لما جاب السرعة ال 512 لواحده؟
و اجرس الاهرامات؟
و اصيت لشحتبسوت؟

سوجارة وقتية طلعت من الواد حمدي كنسلة و الله يا جدعان انا ما عارف منغير حمدي كنسلة ده كنا حنعمل ايه، و السوجارة المرة دي اسمها سوجارة الباندويث ، طحنة معجون على دهان و بتدمجهم و تسحب نفس واطي الأول .. حتلاقي فجأة عين من عينيك بتنور و التانية بتطفي، متخفش دا الداون لوود و الاب لوود
حتلافي نفسك مخك بيقولك فيرفاي اليوزر و الباسوورد
و عنها و لقينا الدنيا بقيت حر شوية، قلت لحمدي يابني هيه ناقصةـ قاللي عيب يا معلم، دا العيب الوحيد للسوجارة دي، انما هيه حر من كتر السرعة

نزلنا على مكتب حاجة كبيرة قوي في البلد، لقينا الدنيا فاضيةةةةةة، قلت للحارس اللي على الارض انا عايز اقابل سعادة المسؤول الكبير قاللي ياباشا انت تأمر، خدني بالاساسنير لحد المسؤول الكبير
قلتله يا بيه الاسعار في انجلترا كذا و في المانيا كذا و رسيته على الليلة
مفيش ثانية والله ثانيةـ، قاللي تصدق مكنتش اعرف، طب ردا على العالم كله انا حغير القرار بتاعي و حخلي كل مصري ياخد بواحد وعشرين جند شهري سرعة 1 جيجيا في الثانية
نزلت و الجماهير استقبلتني من باب المسؤول بالاحضان و الزغاريط و رحنا كلنا لحد قهوة بونابرت ، يا سلام . ميزة بلدنا اننا بس نطلب، يعني نأشر و المسؤول الكبير ينفذ

و فتحنا النت بقى و معاك يا داونلوود، نزلنا اللينوكس و اليونكس و الورد برس و الورد اوفسس و الاغاني و الافلام و السيكوهات و الكراكات و الجيمات و الشعبيات و ايه و ايه و ايه .. من كتر اللي عملناه ليلتها الويندوز صرخت من الرعب و احنا بنقفل الجهاز و بدل ما تطلعلنا علامة الويندوز و هيه بتقول انا بقفل، طلعتلنا احتراما و تبجيلا علم مصر و شغلت موسيقة تحية العلم

مصر بقيت برد قوي

2007-07-30T01:23:00.001-07:00

كل ما اصحى الصبح و ادهن سناني بمية السيجنال الاقي المواعين كلها نورت و العرق نازل شلالات ، دا انا يا راجل باخد سبع دش في اليوم من كتر الحر، دش عرق و انا نايم ، و دش ناموس و مش عارف الناموس بيطلعله عضلات مع الحر .. كل ما الحر ما يزيد الناموس يكبر و حنرجع لموضوع الناموس دا تاني .. و بعد كده دش اصلا مية عشان بتترمي عن طريق الحجة على وشي وانا على السرير بأوامر توصية شخصية مني ، عشان اعرف افك اللزقة اللي المواعين فيها و اقوم من السرير، و بعديها دش تاني ممثل في اني بخش بجسمي كله على الحوض و افتح الحنفية و لما المرحلة دي بتخلص ببقى كده قادر اتحرك و اصلب طولي، فبخش بقى على البانيو اخدلي غطس و اصحى و افوق

على ما اخف الجثة بشوية شاي و تمارين صباح و فطار و الذي منه و انزل اقضي حياتي العملية و اركب التاكسي اللوزة بتاعي بلاقي نفسي دخلت في مرحلة العرق تاني بضطر اطلع و ابتدي فيلم الحمامات الهندي ده من الاول

قلت في نفسي و على ايه اتصلت بالواد حمدي كنسلة و قلتله يابني تعالى قالي ايه على الصبح

و نزل عليا بهرموناية النورث بوول، و دي بقى يا معلم عبارة عن خلطة صنف كولومبي مخصوصة مضروبة في ريش نعام افرنجي تعمل مزاج حلو، طريقة الاعداد تاخد خمس حتت تدوبهم في المية مع كيس بودرة تلج عشان تنعم معاك متظفلطش، و تنزل عليها سحب بالعجانة لحد ما تبقى كلها سطح واحد وبيضا زي التلج ، تلفها في ورق مجلة روزاليوسف القديم قوي بتجيبه من بايعين الازبطية القدام
و تخش عليها بالولعة درجة حرارة 40 و من زاوية 62 درجة بالظبط تقيس دخول النار على السجارة بالمنقلة

و عنها و الدنيا بدأت تمطر، و نسينا الشماسي طبعا انا و حمدي كنسلة
و الباطنية بقيت كلها مية
و رعد و برق
و بعدين التلج بدأ ينزل
و غرقنا تلج .. الواد حمدي كان ناقصله جزارية في نص وشه و يبقى ايس مان
و قعدت انا و حمدي نلعب لعبة التحزلق على الجليد و نستعيش مع الدنيا شوية لحد ما الواد حمدي ما فقد في ظروف غامضة فجبت كلاب التلج و طلعت بالزلاجة ادور عليه
و لقيت شوية بطاريق في الشارع، يا اخي مصر بقيت مليانة بطاريق مش عارف البرد ده كله ايه سببه
لحد ما لقيته منهار تحت جبل تلجي الظاهر الحجة ام استحسان رمت شوية زبالة على الشارع فنزلوا على الجبل و قعدوا يلفوا لحد ما عملوا كورة تلج قعدت تلف و تكبر و هيه نازلة من الجبل لحد ما طقشت على نفوخ حمدي كنسلة ظبطته

السعر الجديد للنت حراق قوي

2007-07-21T16:57:00.001-07:00

بأمانة الموضوع ده لو عدى كده من غير ما يتحلق، تبقى البلد دي عليها العوض و منها العوض
اللي خد القرار ده مشكلته انه مش بتاع انترنت، ميعرفش ان مصر فيها شباب مدمن للنت زيه زي مدمنين المخدرات و العيال دي اصلا بتدمن النت لأن ده شغلها و اكل عيشها، خدلي عندك المبرمجين و النشطاء و المصممين و بتوع البزنس و المصانع كلها اللي بتسوق منتجاتها برة و الشباب اللي داخل على النت عشان يلعب جيمز و يتلهي عن السياسة و الاقتصاد بتوع البلد و مشاكلهم و التشات و السيكو سيكو امم
و انا اتحدىاي جهة احصائية ايا كانت انها تقدر تقول فيه كام واحد او مستخدم اونلاين من مصر

احنا معديين العشرة مليون بكتير كمان على النت و الكلام ده مش احلام اللي ينزل الجمالية و لا الباطنية و لا المرج و لا حتى السيدة حيصعق ان النت شغالة هيه و الجيمز على الاجهزة الله ينور

دلوقتي دي اكيد ثورة اتصالات .. اللي عايش على حس ان البلد بيستخدم الناس فيها النت 4 مليون بس يعيش مع مشكلته هوه ما دام مش قادر يحسب
انما بقى انك تقولي 45 جند لاتنين جيجا

معلش اقل واحد فيكي يا مصر بينزل فوق ال40 جيجا شهري

كام واحد بيقرا دلوقتي مبينزلش افلام و يسيب جهازه مفتوح اربعة و عشرين ساعة ؟

عارف ال 50 جيجا استهلاك دول حيدفعوك كام ؟
500 جنيه شهري

اطرح منهم بقى الاتنين جيجا المجانا الصدقة بتاعة الوزارة دي ولا تدفعها
براحتك بقى

يا جدعان فوقتوني الله يخرب بيوتكم

العداد

2007-07-17T08:56:00.000-07:00

دخلنا يا سيدي استوكهولم
و تذكرة استوكهولم سهلة و الفيزا اسهل
كل الفكرة بتجيب سوجارة طرنادة للرحلات الجوية و دي خليط من مجموعة من الخامات المستصلحة في كولومبيا و سينا مع بعض بخلطة مخصوصة، تلفهم في ورقة شمال افريقيا، و تخش عليهم بولعة من على الزاوية اتلاتين درجة، و تسحب اول نفس قصير، بعديها تتنفس و تشوف اخبارك . جابت معاك الرئة دخان و لا لسه سالكة ، جابت معاك يبقى مبروك حتوصل، تنزل بقى على السجارة و تسحب نفس طويييييل تقعد فيه شوية متزهقش.. بعديها حتكح كحتين و انت مغمض عينك .. طبعا انت حتغمض عينك غصب عنك بسبب التأثير بتاع الصنف، محدش اما يكون مين فيها يعرف يفتح عينه بعد النفس ده .. بس بعد ما تكح افتح عينك تاني تلاقي نفسك في استوكهلم

و انا و الواد حمدي كنسلة بقينا في استوكولهم، و مقولكش بقى ... نضافة ايه و انهار ايه و محلات ايه و مزز ايه
كل حاجة نضيفة، قررنا ناخد تاكسي بقى لحد باب الاوتيل عشان نكمل موضوعنا و احنا بنشرب قهوة في استوكهولم
لقينا التكسي عاملك الواد الالافرنكا و مركبلي عداد .. قلتله يابا الحج عداد ايه انت فاكرنا مساطيل
قاللي : يا بيه استوكهولم كده لازم كل حاجة بالعداد
يا عمي انا سواق تاكسي في مصر و عارف انا بقولك ايه، بلاش تعملهم عليا عداد ايه و بتاع ايه
حنظبك بشلن لحاليح لما توصلنا تعيش بيه
كلمة منه في كلمة مني مسكنا في رقبة بعض فخلعتله العداد من التاكسي

يتبع ..

حالة توهان

2007-07-14T17:07:00.000-07:00

ليلتها انا و الواد حمدي كنسلة كنا متلقحين على الرصيف في الدرب الكحلي بنستبادل الانفاس من سوجارة المكتب رقم 18

حمدي كنسلة : بيقولوا ان المعلمة حالة توهان حتسيب الملعب و تنزل بدالها المستشرقة ايسان الدغدغة في برنامج قناة رومانة الاجتماعية المعروف باسم حالة شوي

قلتله: ياد انت بتقول ايه انا مش فاهم منك حاجة عفر كده و احدفني بعديك على باريس

حمدي كنسلة ولع في السوجارة بحيث ان النار تلمس الطرف من زاوية 45 و دي بتسفر الواحد وقتي على باريس .. الواد شعشع النار في اللفافة و باصالي السيجارة و قالي الرحلة 219 على شيكاغو يا معلم عاصمة الاندلس حتسافر ترانزيت من هناك على باريس وش

و رحنا باريس عشان نتكلم على راحتنا على ضفة نهر الالب جنب جبال السين على طول، اصل محسبوكم لما الموضوع يوصل انهم يغيروا مذيعة اعلامية كبيرة باعلامية كبيرة تانية لازم يسحب مزاجة في باريس تحديدا

وعنها و قعدت امخمخ المسألة في الجمجمة القديمة بتاعتي و اللي فيها كل اسرار الطبيخ الشعبي، و قلتله مش المذيعة حالة توهان دي هيه اللي استضافت الاربع اوكش الشرشر كركر ؟ يعني بنات الليل

قاللي عفارم عليك يا بو انحراف . بتجيبها و هيه فايرة

قلتله طب ما صح كده ياد

قاللي اعربلي يا معلم

قلتله خلاصة الاعراب ان المستشرقة ايسان الدغدغة طول عمرها بتألف و بطلع افلام في السينما، و كل افلامها عن الاشكال الرمة بتاعة بلدنا، و لامؤاخذة الحرمة من دول ميلمهاش غير راجل يشكمها و دي بقى بتحاول تفهمنا ان الراجل من دول ميلموش غير حرمة تسيبله نفسها فهمت

الواد كنسلة نزل ايده في نهر الالب و رشفلة رشفة من النهر و قالي والله اقطع دراعي من سوجارته لو انا فاهم حاجة

يا عبيط السينمائية المستشرقة الدغدغة عايزة تستضيف عينات ضايعة من المجتمع زي الاربعة الشرشر كركر، و تدرسهم عشان تطلع منهم قوصص تعمل منها افلام

كنسلة ازبهل و قاللي : يا معلم سعيد يابن اللعيبة، و دي عرفتها ازاي
و على كده برنامج حالة شوي مش حيستضيف نجوم تاني ؟

عيب عليك اكيد حيستضيف بس بقى خدلي الدلع على وش ، و عديلي حلقتين نجوم و حلقة إش

كنسلة: حلقة إش ؟

آآآآههه يعني حلقة فيها شرشر كركر

كنسلة: طب بم انها حستضيف الشباب الضايع يبقى مش بعيد حتستضيفنا احنا كمان يا معلمة

ضحكت و قلتله: تستضيف مين يا كرس، اسحب النفس المتين و عيشني في استوكهولم

الحلقة الجاية حقولكم حصل ايه في استوكهولم

افتتاح المدونة

2007-07-09T05:37:00.000-07:00

بسم الله
بإذنك يا رب قررت أنا المدعو سعيد انحراف أحد المؤسسين للحركة الصياعية الفنية في مصر القديمة و ضواحيها كتابة ذكرياتي على مدونة تمثل الموقع الفورماللي بتاعي
و ذلك بغرض تسجيل خبراتي اللي ممكن تفيد الشباب الضايع على العموم

إحنا بإذنك يا رب بنرحب بكل الشباب العربي اللي جي يقرا ذكرياتي، و احب اقول اني مش بس جي النهارده عشان اقول مساء الخير عليكي يا انترنت .. لا انا جي مخصوص عشان اقول ان النت بقت مراية البشرية اللي ماشية في الشارع. صور الشوارع و صور الناس بتشيش و الشباب القاعد على القهاوي مترمية في كل حتة في النت و بناء عليه فاحنا فضيحتنا بجلاجل

لازم ننسى موضوع الناس بتاعة برا و الناس بتاعة جوا دا .. يا بيه كل دي حجات فارغة .. دلوقتي الرقاصة الارجانتينية بتقطعلها في الثانية 3 تكات يعني بالمفتشي كده بتجيب وش فيفي عبده في مرمى شوبير، و الشاب الانجليزي اللي نازل بالاسموكنج من الطيارة الرويال على الشيراتون للأهرامات و مناخيره مرتفعة فوق سطح التراب المصري بينزل اخر الليل يهيبر من على القهوة عندنا و يعيش حياته و يتنعنش
ما هو لازم الانجليز برضو يعيشوا الحياة و يتنعنشوا

اصحي يا ايجبت القرن خلص و انتي لسه مصحتيش

هاينز في انجلترا النهارده حتعمل باك للفول المدمس و يتباع علب في السوبرماركتات و مش بعيد نلاقي كمان يومين الدنيا بتمسي علينا في السي ان ان و يطلعولنا بصورة فيكتوريا البيه الهجام بتاعة الحريم الحراقة او في قول اخر السباسيز جيرلز طالعة كده بتتبختر على الشاشة بسندوتش الفول المتعمر من طاسة هاينز

النهارده الشاب من دول عايش الحياة موبايل اخر موضة بنطلون اخر مكوة و مفاتيحة في جيبه و عربيته في جراجه و هوه مش لاقي القضا و عيشي يا دنيا زيه زي اي امريكاني في الوليات المتحدة الامريكية

محدش ميعرفش جورج بوش و محدش مايعرفش في امريكا شعبان عبد الرحيم و الدنيا خلاص بقت سداح مداح على رأي شاعر النيل عدوية

و هيه دي رسالتي للبقر اللي في البلد، الدنيا اتفحت و مصر اتجمدت يا كلاب